_е~_i. Ст~а'гw сщ~енному'ченика _е=леvfе'рiа : И= прп\дбнагw _о=тца` на'шегw па'vла, и='же въ ла'трjь.

Тропа'рь, гла'съ д~:

И= нра'вwмъ прича'стникъ, и= пр\сто'лwмъ намjь'стникъ а=п\слwмъ бы'въ, дjья'нiе w=брjь'лъ _е=си` бг~одохнове'нне, въ видjь'нiя восхо'дъ: сегw` ра'ди сло'во и='стины и=справля'я, и= вjь'ры ра'ди пострада'лъ _е=си` да'же до кро'ве, сщ~енномч~нче _е=леvfе'рiе, моли` хр\ста` бг~а сп~сти'ся душа'мъ на'шымъ.

Сла'ва, прп\дбнагw, гла'съ то'йже:

JА='кw безпло'тныхъ _е=диновсе'льника, и= всjь^мъ прп\дбнымъ со_о'бщника, всесла'вне па'vле, пое'мъ тя`, и= мо'лимъ тя`: моли'ся всегда` w= на'съ, jа='кw да w=бря'щемъ мл\сть.

Конда'къ прп\дбнагw, гла'съ и~. Подо'бенъ: Взбра'нной:

W\т ю='ности, му'дре, jа=`же па'че смы'сла вожделjь'лъ _е=си` му'жески, мiрскi'й мяте'жъ w=ста'вилъ _е=си`, и= бы'лъ _е=си` бж~е'ственнагw ра'ди жи'тельства тр\оцы жили'ще, и= просвjьти'лъ _е=си` вjь'рою приступа'ющыя тебjь`. тjь'мъ зове'мъ: ра'дуйся, па'vле пребога'те.

Конда'къ сщ~енному'ченика, гла'съ в~. Подо'бенъ: Тв_е'рдыя:

JА='кw о_у=добре'нiе сщ~е'нникwвъ преподо'бне и= предувjьща'нiе стр\стоте'рпц_евъ вси` восхваля'емъ, и= про'симъ тя`, сщ~енному'чениче _е=леvfе'рiе: любо'вiю па'мять твою` пра'зднующыя бjь'дъ многоwбра'зныхъ свободи`, моля` непреста'ннw w= всjь'хъ на'съ.

И= и='же во ст~ы'хъ _о=тца` на'шегw стефа'на и=сповjь'дника, а=рхiеп\скпа суро'жскагw.

Тропа'рь, гла'съ д~:

JА='кw ст~и'тель со безпло'тными _е=диножи'тель бы'въ, сщ~енному'чениче стефа'не: воспрiе'мъ бо кр\стъ jа='кw _о=ру'жiе, и= ста'въ крjь'пкw сопроти'въ i=кwноукори'теля и= духобо'рцwвъ, не покланя'ющихся пречи'стому w='бразу хр\ста` бг~а на'шегw, и= w\тсjь'клъ _е=си` вся'ку _е='ресь лука'выхъ: тогw` ра'ди прiе'мь муче'нiя вjьне'цъ, и=зба'вилъ _е=си` гра'дъ тво'й суро'жъ w\т вся'кiя непрiя'зни. и= ны'нjь мо'лимъ тя`, ст~е, да и=зба'виши на'съ w\т вся'кихъ sлы'хъ и=скуше'нiй и= бjь'дъ, и= вjь'чныя му'ки.

Конда'къ, гла'съ г~:

Вы'шнягw си'лою сщ~е'нне о_у=крjьпи'вся, цар_е'ва низложи'лъ _е=си` i=кwнобо'рная шата^нiя: дне'сь суро'жу и= на'мъ вjь^рнымъ предлежа'тъ сла'ва и= бога'тство ст~ы^я твоя^ мw'щи, и=`хже свы'ше дароно'сятъ а='гг~льстiи чи'нове: пjь'сньми и= пjь'нiемъ славосло'вятъ тя`, вели'кiй сщ~е'нный стефа'не.