и~. Ст~а'гw великомч~нка проко'пiа.

Тропа'рь, гла'съ д~:

Мч~нкъ тво'й гд\си, проко'пiй, во страда'нiи свое'мъ вjьне'цъ прiя'тъ нетлjь'нный w\т тебе` бг~а на'шегw: и=мjь'яй бо крjь'пость твою`, мучи'телей низложи`, сокруши` и= де'монwвъ немощны'я де'рзwсти: тогw` мл~твами сп~си` ду'шы на'шя.

Конда'къ, гла'съ в~. Подо'бенъ: Вы'шнихъ и=щя`:

Ре'вностiю ко хр\сту` бж~е'ственною распала'емь, и= кр\ста` крjь'постiю w=гражда'емь, врагw'въ шата'нiе и= де'рзость низложи'лъ _е=си` проко'пiе, и= честну'ю цр~ковь возвы'силъ _е=си`, вjь'рою преуспjьва'я, и= просвjьща'я на'съ.

Въ то'йже де'нь воспомина'нiе зна'менiя, jа='вльшагwся w\т i=кw'ны прест~ы'я вл\дчцы на'шея бц\ды, ч\стна'гw и= сла'внагw _е=я` бл~говjь'щенiя, во гра'дjь вели'цjьмъ о_у='стюзjь: И= ст~а'гw проко'пiа, хр\ста` ра'ди ю=ро'дивагw, о_у='стюжскагw чудотво'рца.

Тропа'рь, гла'съ д~:

Просвjьти'вся бж~е'ственною бл~года'тiю бг~ому'дре, и= ве'сь ра'зумъ и= се'рдце, w\т су'етнагw мi'ра сегw` къ зижди'телю неукло'ннw возложи'въ, цjьлому'дрiемъ и= мно'гимъ терпjь'нiемъ, во вре'меннjьй жи'зни тече'нiе до'брjь сконча'лъ _е=си`, и= вjь'ру соблю'лъ _е=си` непоро'чну. тjь'мже и= по сме'рти jа=ви'ся свjь'тлость житiя` твоегw`: и=сточа'еши бо чуде'съ и=сто'чникъ неисчерпа'емый, вjь'рою притека'ющымъ ко ст~о'му твоему` гро'бу, проко'пiе всебл~же'нне, моли` хр\ста` бг~а, да сп~се'тъ ду'шы на'шя.

Конда'къ, гла'съ д~:

Хр\ста` ра'ди ю=ро'дствомъ возду^шная мыта^рства, на рука'хъ а='гг~льскихъ неприкоснове'ннw преше'дъ, цр\скагw дости'глъ _е=си` пр\сто'ла, и= w\т цр~я` всjь'хъ хр\ста` бг~а да'ръ прiе'мъ бл~года'ть и=сцjьле'нiй: мно'гими во чудесы` твои'ми и= зна'менiемъ стра'шнымъ о_у=диви'лъ _е=си` гра'дъ тво'й вели'кiй о_у='стюгъ. лю'демъ твои^мъ мл\сть и=спроси'въ, мv'ро w\т ч\стна'гw w='браза прест~ы'я бц\ды мл~твою и=зве'лъ _е=си`, и= неду^жнымъ по'далъ _е=си` цjьльбы^. тjь'мже мо'лимъ тя` чудоно'сче проко'пiе, моли` хр\ста` бг~а непреста'ннw, пода'ти грjьхw'въ на'шихъ проще'нiе.

Въ сi'й де'нь jа=вле'нiе w='браза прест~ы'я бц\ды во гра'дjь каза'ни.

Тропа'рь, гла'съ д~:

Засту'пнице о_у=се'рдная, мт~и гд\са вы'шнягw, за всjь'хъ мо'лиши сн~а твоего` хр\ста` бг~а на'шего, и= всjь^мъ твори'ши сп~сти'ся, въ держа'вный тво'й покро'въ прибjьга'ющымъ. всjь'хъ на'съ заступи`, _w гп\сже` цр~и'це и= вл\дчце, и=`же въ напа'стехъ и= ско'рбехъ, и= въ болjь'знехъ w=бремене'нныхъ грjьхи` мно'гими, предстоя'щихъ и= моля'щихся тебjь` о_у=миле'нною душе'ю, и= сокруше'ннымъ се'рдцемъ, пред\ъ преч\стымъ твои'мъ w='бразомъ со слеза'ми, и= невозвра'тнw наде'жду и=му'щихъ на тя`, и=збавле'нiя всjь'хъ sw'лъ, всjь^мъ пол_е'зная да'руй, и= вся^ сп~си` бц\де дв~о: ты' бо _е=си` бж~е'ственный покро'въ рабw'мъ твои^мъ.

Конда'къ, гла'съ и~. Подо'бенъ: Взбра'нной:

Притеце'мъ лю'дiе къ ти'хому сему` и= до'брому приста'нищу, ско'рой помо'щницjь, гото'вому и= те'плому сп~се'нiю, покро'ву дв~ы, о_у=скори'мъ на мл~тву, и= потщи'мся на покая'нiе: и=сточа'етъ бо на'мъ неwску^дныя мл\сти, преч\стая бц\да, предваря'етъ на по'мощь, и= и=збавля'етъ w\т вели'кихъ бjь'дъ и= sw'лъ, бл~гонра^вныя и= бг~обоя'щыяся рабы^ своя^.