в~_i. И='же во ст~ы'хъ _о=тца` на'шегw меле'тiа, а=рхiепi'скопа а=нтiохi'и вели'кiя.

Тропа'рь, гла'съ д~:

Пра'вило вjь'ры и= w='бразъ кро'тости, воздержа'нiя о_у=чи'теля jа=ви' тя ста'ду твоему`, jа='же веще'й и='стина: сегw` ра'ди стяжа'лъ _е=си` смире'нiемъ высw'кая, нището'ю бога^тая, _о='тче меле'тiе, моли` хр\ста` бг~а сп~сти'ся душа'мъ на'шымъ.

Конда'къ, гла'съ s~:

Дх~о'внагw твоегw` дерзнове'нiя о_у=боя'вся w\тсту'пникъ бjь'гаетъ македо'нiй: мл~твенное же служе'нiе соверша'юще твои` раби`, любо'вiю притека'емъ, а='гг~лwмъ собесjь'дниче меле'тiе, _о='гненный мечу` хр\ста` бг~а на'шегw, вся^ безбw'жныя закала'яй: воспjьва'емъ тя` свjьти'льника, просвjьти'вшаго вся^.

Въ то'йже де'нь, и='же во ст~ы'хъ _о=тца` на'шегw а=ле_ксi'а митрополi'та, всея` рwссi'и чудотво'рца.

Тропа'рь, гла'съ и~:

JА='кw а=п\слwмъ сопресто'льна, и= врача` предо'бра, и= служи'теля бл~гопрiя'тна, къ ра'цjь твое'й честнjь'й притека'юще ст~и'телю а=ле_ксi'е, бг~ому'дре чудотво'рче, соше'дшеся любо'вiю въ па'мять твою` свjь'тлw пра'зднуемъ, въ пjь'снехъ и= пjь'шихъ ра'дующеся, и= хр\ста` сла'вяще, такову'ю бл~года'ть тебjь` дарова'вшаго и=сцjьле'нiй, и= гра'ду твоему` вели'кое о_у=твержде'нiе.

Сла'ва, и='нъ тропа'рь, гла'съ д~:

А=п\сльскихъ догма^тъ _о=па'сна храни'теля, цр~кве рwссi'йскiя па'стыря и= о_у=чи'теля, пребл~же'ннагw а=ле_ксi'а ст~и'теля па'мять пра'зднующе, славосло'вимъ хр\ста` бг~а на'шего пjь'сньми достодо'лжными, дарова'вшаго на'мъ о_у=го'дника своего` jа='кw _о=би'льный и=сто'чникъ точа'щь врачева^нiя, гра'ду же москвjь` похвалу` и= о_у=твержде'нiе.

Конда'къ, гла'съ и~. Подо'бенъ: Взбра'нной:

Бж~е'ственнаго и= пречестна'го ст~и'теля хр\сто'ва, но'ваго чудотво'рца а=ле_ксi'а, вjь'рнw вси` пою'ще лю'дiе, любо'вiю да о_у=бл~жи'мъ, jа='кw па'стыря вели'каго, служи'теля же и= о_у=чи'теля прему'дра земли` рwссi'йстjьй: дне'сь въ па'мять _е=гw` прите'кше, ра'достнw возопiе'мъ пjь'снь бг~оно'сному: jа='кw и=мjь'я дерзнове'нiе къ бг~у, многоwбра'зныхъ на'съ и=зба'ви w=бстоя'нiй, да зове'мъ ти`: ра'дуйся о_у=твержде'нiе гра'ду на'шему.