а~_i. Ст~а'гw сщ~енномч~нка а=нтv'пы, _е=п\скпа перга'ма а=сi'йскагw.

Тропа'рь, гла'съ д~:

И= нра'вwмъ прича'стникъ, и= пр\сто'лwмъ намjь'стникъ а=п\слwмъ бы'въ, дjья'нiе w=брjь'лъ _е=си` бг~одохнове'нне, въ видjь'нiя восхо'дъ: сегw` ра'ди сло'во и='стины и=справля'я, и= вjь'ры ра'ди пострада'лъ _е=си` да'же до кро'ве, сщ~енномч~нче а=нтv'по, моли` хр\ста` бг~а сп~сти'ся душа'мъ на'шымъ.

И=ли` се'й, гла'съ то'йже:

I='дwльскiя л_е'сти о_у=праздни'лъ _е=си` а=нтv'по, и= дiа'вольскую попра'въ си'лу, пред\ъ богобо'рцы дерзнове'ннw хр\ста` и=сповjь'далъ _е=си`. тjь'мже со а='гг~льскими чи'ны въ вы'шнихъ водворя'яся, вл\дцjь всjь'хъ славосло'вiе принося`, и= w= на'съ моле'бное бл~годаре'нiе предлага'еши, бл~года'ть цjьльбы` да'руя. сегw` ра'ди тя` чти'мъ сщ~енномч~нче а=нтv'по, моли` хр\ста` бг~а, да сп~се'тъ ду'шы на'шя.

Конда'къ, гла'съ д~. Подо'бенъ: Вознесы'йся:

А=п\слwвъ сопресто'льникъ, и= ст~и'телей о_у=краше'нiе бы'лъ _е=си` бл~же'нне, мч~нчески просла'вився, возсiя'лъ _е=си` jа='коже со'лнце, всjь'хъ просвjьща'я, а=нтv'по сщ~е'нне, разруши'лъ _е=си` безбо'жiя но'щь глубо'кую: сегw` ра'ди тя` почита'емъ, jа='кw бж~е'ственнаго су'ща сщ~енномч~нка, и= цjьле'бъ пода'теля.