Глагол ко читателю. Слово Христово богатно да вселяется в вас во всякой премудрости: учаще и вразумляюще себе самех во псалмех и пениих и песнех духовных, о благодати поюще в сердцах ваших Господеви. Трудимся юнии, в юности бо собираемая на старость изнемогшая питают. Труды наша и страдания недостойни противу будущаго воздаяния. Послушаем избранного сосуда, святаго апостола Павла, подъемшаго ярем Христов и понесшаго труды со страданием, сице глаголет (Кор. зач. 177): Вся бо вас ради да благодати умножившися множайшими благодарении избыточествит во славу Божию. Тем же не стужаем си, но аще и внешний наш человек тлеет, но внутренний наш обновляется по вся дни. Еже бо ныне легкое печали нашей, по преумножению в преспеяние тяготу вечныя славу соделовает нам: не смотрящим нам видимых, но невидимых: видимая бо временна, невидимая же вечна.

От тщавшагося в сем деле ко учащимся
Сицевыя стихи краегранесныя:

Духовная радости труды сподобляют,
И в жизнь вечную горнью во веки вселяют.
Аз вам глаголю сими пекла убегайте,
К псалмопению бодры всегда прибегайте.
О делех хранитеся радети безчинных,
Неба вас сподобит Бог за сие безвинных.
И помышление си вправду управляймо
О конце спасения присно помышляймо.
А что есть все да вемы быти учению,
Нашему отложити требе неможению,
Изволению твердо не быти в лености,
К себе Божия всегда взывая милости.
Ий учителей чтяще их не оскорбляя,
Таковым путем шествуя блажен поспешая.
Работая Господу со страхом в крепости,
Он нас всех да сохранит в разума целости.
Философии горней присно поучаймо,
И к земной, како жити себе, понуждаймо,
Милосердствующе нам о своем спасении,
О сем пребудет наша мысль попечении.
В тесной стезе будуще чего всем нам требе,
Сыны Бога реченны будемо и в небе.
Нижняя вся от себе токмо да отринем,
К тихому пристанищу со миром прибегнем.
О небе помышляти да како спасемся,
Разум к свету приводит, о нем да печемся.
Его же тма ересей всегда оставляет,
Неведение зло есть, на зло наставляет.
Его же бегающе пекла убегаем,
В веки разум держаще и Бога сподобляем.

Аминь.

Акростих: "Диакон Иоаникий Трофимов сын Коренев".
Мусикийская грамматика Николая Дилецкого.
Посмертный труд С. В. Смоленского. Спб., 1910. С. 5-7.